కేరళ ముఖ్యమంత్రికి లేఖ రాసిన కుంభమేళా బ్యూటీ మోనాలిసా

'కుంభమేళా వైరల్ స్టార్'‌గా పేరుపొందిన మోనాలిసా భోస్లే వివాదంలో గురువారం అనూహ్య మలుపు చోటుచేసుకుంది. మధ్యప్రదేశ్ పోలీసులు తనను బలవంతంగా సొంతూరికి తీసుకెళ్లే అవకాశం ఉందని ఆందోళన వ్యక్తం చేస్తూ, తనకు రక్షణ కల్పించాలని కేరళ ముఖ్యమంత్రి పినరయి విజయన్‌కు, కొచ్చి నగర పోలీస్ కమిషనర్‌ పుట్ట విమలాదిత్యకు ఆమె లేఖ రాసింది. తాను 18 ఏళ్లు నిండిన మేజర్‌నని ఆమె ఆ లేఖలో స్పష్టం చేసింది.

మోనాలిసా, ఆమె భర్త ఫర్మాన్ ఖాన్‌పై నమోదైన పోక్సో చట్టం కేసుకు సంబంధించి వారి వాంగ్మూలాలను నమోదు చేసేందుకు మధ్యప్రదేశ్ పోలీసు బృందం కొచ్చికి చేరుకున్న సమయంలో ఈ పరిణామం జరిగింది. తిరువనంతపురం సమీపంలోని ఓ ఆలయంలో మార్చి 11న వీరి వివాహం జరిగినప్పుడు మోనాలిసా మైనర్ అని జాతీయ గిరిజన కమిషన్ విచారణలో తేలడంతో ఈ కేసు నమోదైంది. అయితే, కేరళ హైకోర్టు నుంచి ఫర్మాన్ ఖాన్ మే 20 వరకు అరెస్ట్ కాకుండా స్టే పొందగలిగాడు.

ఈ వివాదం కేరళలో రాజకీయ దుమారం రేపింది. అధికార సీపీఎం నేతల అండతోనే మైనర్ బాలిక వివాహం జరిగిందని రాష్ట్ర బీజేపీ ప్రధాన కార్యదర్శి ఎస్. సురేశ్ ఆరోపించారు. దీనికి బాధ్యులైన వారిపై క్రిమినల్ చర్యలు తీసుకోవాలని డిమాండ్ చేశారు. అయితే, ఈ ఆరోపణలను సీపీఎం ఖండించింది. తాము పెళ్లి నిర్వహించలేదని, విషయం తెలిసిన తర్వాత కేవలం హాజరయ్యామని స్పష్టం చేసింది.

మరోవైపు, మోనాలిసా తల్లి లతా భోస్లే తన కుమార్తె 2009 డిసెంబర్‌లో జన్మించిందని, ఆమె మైనర్ అని వాదిస్తోంది. సినిమా అవకాశాల ఆశ చూపి తన కుమార్తెను ప్రలోభపెట్టి తీసుకెళ్లారని ఆరోపించింది. పెళ్లి కోసం నకిలీ జనన ధృవీకరణ పత్రం సృష్టించారని, కమిషన్ ప్రాథమిక దర్యాప్తులోనూ ఇదే విషయం వెల్లడైందని తెలిపారు. మధ్యప్రదేశ్‌లోని ఆసుపత్రి రికార్డుల ప్రకారం కూడా వివాహ సమయంలో మోనాలిసా వయసు 16 ఏళ్లేనని తేలడం కేసును మరింత సంక్లిష్టంగా మార్చింది.

ప్రస్తుతం ఈ కేసుపై విచారణను తీవ్రతరం చేసిన గిరిజన కమిషన్, కేరళ, మధ్యప్రదేశ్ రాష్ట్రాల సీనియర్ పోలీస్ అధికారులను ఢిల్లీకి విచారణకు హాజరు కావాలని ఆదేశించింది. ఒకవైపు తాను మేజర్‌నని మోనాలిసా కేరళలో రక్షణ కోరుతుండగా, ఆమె కుటుంబం, మధ్యప్రదేశ్ అధికారులు మాత్రం ఆమె మైనర్ అని చెప్పడంతో ఈ కేసు రెండు రాష్ట్రాల మధ్య సంక్లిష్టమైన చట్టపరమైన, రాజకీయ పోరాటంగా మారింది.